ಈ ವಾರ ಬಿಡುಗಡೆಗೊಳ್ಳಲಿರುವ ಸಿನಿಮಾಗಳ ಯಾದಿಯಲ್ಲಿ ಬಹುನಿರೀಕ್ಷಿತ ಚಿತ್ರವಾಗಿ ದಾಖಲಾಗಿರೋದು ಗೌರಿಶಂಕರ್ (gowrishankar srg) ನಾಯಕನಾಗಿ ನಟಿಸಿರುವ (kerebete movie) `ಕೆರೆಬೇಟೆ’. ಸ್ಟಾರ್ ನಟರ ಸಿನಿಮಾವಾದರೆ ಅದಕ್ಕೆ ಬೇಕಾದಂಥಾ ಪ್ರಚಾರಗಳು ತಾನೇತಾನಾಗಿ ಸಿಕ್ಕಿಬಿಡುತ್ತದೆ. ಆದರೆ, ಸಿನಿಮಾ ವ್ಯಾಮೋಹವನ್ನೇ ಉಸಿರಾಗಿಸಿಕೊಂಡ ಚಿತ್ರತಂಡಗಳ ಪಾಲಿಗೆರ ಕಂಟೆಂಟು, ಕ್ರಿಯೇಟಿವಿಟಿಗಳ ಹೊರತು ಬೇರ್ಯಾವ ಕಸುವೂ ಇರುವುದಿಲ್ಲ. ಆ ಮಿತಿಯನ್ನು ಕ್ರಿಯಾಶೀಲತೆಯ ಹಾದಿಯಲ್ಲಿ ನೀಗಿಕೊಂಡ ಅನೇಕ ಚಿತ್ರಗಳು ಪ್ರೇಕ್ಷಕರನ್ನ ತಂತಾನೇ ಸೆಳೆಯೋದಿದೆ. ದೊಡ್ಡ ಮಟ್ಟದ ಗೆಲುವಿನ ರೂವಾರಿಯಾದ ಉದಾಹರಣೆಗಳೂ ಇದ್ದಾವೆ. ಸದ್ಯದ ಮಟ್ಟಿಗೆ ಕೆರೆಬೇಟೆಯ ಸುತ್ತ ಅಂಥಾದ್ದೊಂದು ಸಕಾರಾತ್ಮಕ ನಿರೀಕ್ಷೆ ಗಸ್ತು ಹೊಡೆಯಲಾರಂಭಿಸಿದೆ.
ಅಷ್ಟಕ್ಕೂ, ಕೆರೆಬೇಟೆ ಹಂತ ಹಂತವಾಗಿ ಪ್ರೇಕ್ಷಕರನ್ನು ಸೆಳೆದಿದ್ದೇ ಹಾಡುಗಳು, ಟ್ರೈಲರ್ ಮತ್ತು ವಿಭಿನ್ನ ಪ್ರಚಾರದ ಪಟ್ಟುಗಳ ಮೂಲಕ. ಒಟ್ಟಾರೆ ಸಿನಿಮಾದ ಅಸಲೀ ಆಂತರ್ಯಕ್ಕೆ ತಕ್ಕುದಾಗಿ, ಮಲೆನಾಡು ಸೀಮೆಯ ಶೈಲಿಯಲ್ಲಿ ನಡೆಸುತ್ತಾ ಬಂದಿರುವ ಪ್ರಚಾರಕ್ಕೆ ಪ್ರೇಕ್ಷಕರೆಲ್ಲ ಮನಸೋತಿದ್ದಾರೆ. ಇದೀಗ ಬಿಡುಗಡೆಯ ಅಂಚಿನಲ್ಲಿ ಮೆಲೋಡಿಯಸ್ ಹಾಡೊಂದನ್ನು (ashwini puneeth rajkumar) ಅಶ್ವಿನಿ ಪುನೀತ್ ಪುನೀತ್ ರಾಜ್ ಕುಮಾರ್ ಬಿಡುಗಡೆಗೊಳಿಸಿದ್ದಾರೆ. ಮೊನ್ನೆದಿನ ನಡೆದಿರುವ ಅಚ್ಚುಕಟ್ಟಾದ ಸಮಾರಂಭದಲ್ಲಿ ಅಶ್ವಿನಿ ಈ ಹಾಡನ್ನು ಲೋಕಾರ್ಪಣೆಗೊಳಿಸಿದ್ದಾರೆ. ಇದೇ ಸಂದರ್ಭದಲ್ಲಿ ಸಿನಿಮಾ ತಂಡದ ಬಗ್ಗೆ, ಅದರಲ್ಲಿ ಪಾತ್ರಗಳನ್ನು ನಿರ್ವಹಿಸಿರುವ ಕಲಾವಿದರ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ.
ಹೀಗೆ ಅಶ್ವಿನಿ ಅವರ ಸಾಥ್ ಸಿಕ್ಕಿರೋದರಿಂದ ಕೆರೆಬೇಟೆಗೆ ಮತ್ತಷ್ಟು ಬಲ ಸಿಕ್ಕಂತಾಗಿದೆ. ಇಂಥಾದ್ದೊಂದು ಚೆಂದದ ಕಾರ್ಯಕ್ರಮದಲ್ಲಿ `ಕಣ್ಣುಗಳೆ ಕಳೆದು ಹೋದಾಗ’ ಎಂಬ ಹಾಡು ಬಿಡುಗಡೆಗೊಂಡಿದೆ. ವಿರಹದ ಕುಲುಮೆಯಲ್ಲಿ ಹದಗೊಂಡಂತೆ ಭಾಸವಾಗುವ ಈ ಹಾಡಿಗೆ ಪ್ರಮೋದ್ ಮರವಂತೆ ಸಾಹಿತ್ಯ ಬರೆದಿದ್ದಾರೆ. ಗಗನ್ ಬದೇರಿಯಾ ಸಂಗೀತ ಸಂಯೋಜನೆಯ ಈ ಗೀತೆಯನ್ನು ಸಿದ್ಧಾರ್ಥ್ ಬೆಣ್ಮಣ್ಣು ಹಾಡಿದ್ದಾರೆ. ಮೆಲ್ಲಗೆ ಎದೆಗಿಳಿದು ಆವರಿಸಿಕೊಳ್ಳುವಂಥಾ ಈ ಹಾಡೀಗ ಟ್ರೆಂಡಿಗಿನತ್ತ ದಾಪುಗಾಲಿಡುತ್ತಿದೆ. ಬಿಡುಗಡೆಗೆ ಕೆಲವೇ ದಿನಗಳು ಬಾಕಿ ಇರುವ ಹೊತ್ತಿನಲ್ಲಿ ಈ ಹಾಡಿನ ಮೂಲಕ ಕೆರೆಬೇಟೆಯತ್ತ ಮತ್ತಷ್ಟು ಪ್ರೇಕ್ಷಕರು ಆಕರ್ಷಿತರಾಗೋದರಲ್ಲಿ ಯಾವ ಸಂದೇಹವೂ ಇಲ್ಲ.
ಜೈಶಂಕರ್ ಜನಮನ ಸಿನಿಮಾಸ್ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಗಗನ್ ಬದೇರಿಯಾ ಸಂಗೀತ, ಕೀರ್ತನ್ ಪೂಜಾರಿ ಛಾಯಾಗ್ರಹಣ, ಜ್ಞಾನೇಶ್-ಯುವರತ್ನ ಸಂಕಲನ, ಕಂಬಿ ರಾಜು ನೃತ್ಯ ನಿರ್ದೇಶನ ಮತ್ತು ಗೋಪಾಲ್ ದೇಶಪಾಂಡೆ, ಹರಿಣಿ, ಸಂಪತ್ ಕುಮಾರ್, ರಘು ರಾಜಾನಂದ, ರಾಮ್ ದಾಸ್, ರಾಕೇಶ್ ಪೂಜಾರಿ, ಚಿಲ್ಲರ್ ಮಂಜು, ಗೌತಮ್ ರಾಜ್, ವರ್ಧನ್ ತೀರ್ಥಹಳ್ಳಿ, ರಣಧೀರ್ ಗೌಡ, ಶೇಖರ್ ಕೆ, ದೇವಿಪ್ರಕಾಶ್, ಆಶಾ ಸುಜಯ್, ವಿದ್ಯಾ, ಕಿರಣ್ ರಾವ್, ಗೀತಾ ಮೈಸೂರು ಮುಂತಾದವರ ತಾರಾಗಣವಿದೆ. ಅಂದಹಾಗೆ, ಕೆರೆಬೇಟೆ ಚಿತ್ರ ಇದೇ ಮಾರ್ಚ್ 15ರಂದು ರಾಜ್ಯಾದ್ಯಂತ ತೆರೆಗಾಣಲಿದೆ.