ಚಂದನ್ ಶೆಟ್ಟಿ (rapper candan shetty) ನಾಯಕನಾಗಿ ನಟಿಸಿರುವ `ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ’ ಚಿತ್ರ ಶುರುವಾತಿನಿಂದ ಇಲ್ಲಿಯವರೆಗೂ ಕ್ರಿಯಾಶೀಲತೆಯಿಂದಲೇ ಪ್ರೇಕ್ಷಕರನ್ನು ಸೆಳೆಯುತ್ತಾ ಬಂದಿದೆ. ಅರುಣ್ ಅಮುಕ್ತ (director arun amuktha) ನಿರ್ದೇಶನದ ಈ ಸಿನಿಮಾವೀಗ ಚಿತ್ರೀಕರಣದ ಅಂತಮ ಘಟ್ಟದಲ್ಲಿದೆ. ಈ ಹೊತ್ತಿನಲ್ಲಿ ಪೋಸ್ಟರ್ ಮತ್ತು ಮೋಷನ್ ಪೋಸ್ಟರ್ ಬಿಡುಗಡೆಗೊಂಡಿದೆ. ಟೈಟಲ್ ಅನಾವರಣವನ್ನ ಭಿನ್ನವಾಗಿ ನಡೆಸಿ, ಒಟ್ಟಾರೆ ಸಿನಿಮಾದ ಬಗ್ಗೆ ಕುತೂಹಲಭರಿತವಾದ ಒಂದಷ್ಟು ವಿಚಾರಗಳನ್ನು ಚಿತ್ರತಂಡ ಹಂಚಿಕೊಂಡಿತ್ತು. ಆದರೆ, ಪಾತ್ರಗಳಾಗಲಿ, ಅವುಗಳ ಚಹರೆಗಳಾಗಲಿ ಗೌಪ್ಯವಾಗುಳಿದಿದ್ದವು. ಇದೀಗ ಈ ಪೋಸ್ಟರ್ ಮತ್ತು ಮೋಷನ್ ಪೋಸ್ಟರ್ ಮೂಲಕ ನಾಲಕ್ಕು ಪಾತ್ರಗಳು ಪ್ರೇಕ್ಷಕರನ್ನು ಮುಖಾಮುಖಿಯಾಗಿವೆ!
ಅಷ್ಟಕ್ಕೂ ಶೀರ್ಷಿಕೆ ಕೇಳಿದರೇನೇ ಇದೊಂದು ಯುವ ಸಮುದಾಯವನ್ನು ಕೇಂದ್ರವಾಗಿಟ್ಟುಕೊಂಡ ಕಥನವೆಂಬ ಸ್ಪಷ್ಟ ಸುಳಿವು ಸಿಗುತ್ತದೆ. ಈಗಾಗಲೇ ಕಿರಿಕ್ ಪಾರ್ಟಿ, ಇತ್ತೀಚೆಗೆ ತೆರೆಕಂಡಿದ್ದ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಮುಂತಾದ ಸಿನಿಮಾಗಳು ಗೆದ್ದಿವೆ. ಕಾಲೇಜು ಸುತ್ತ ಘಟಿಸುವ ಇಂಥಾ ಕಥಾನಕಗಳಲ್ಲಿ ತಮ್ಮ ಕಳೆದು ಹೋದ ಕ್ಷಣಗಳನ್ನು ಹುಡುಕುವ ದೊಡ್ಡದೊಂದು ಪ್ರೇಕ್ಷಕ ವರ್ಗ ರಾಜ್ಯದಲ್ಲಿದೆ. ಅಂಥಾ ಪ್ರೇಕ್ಷಕರಿಗೆಲ್ಲ ಹೊಸಾ ಅನುಭೂತಿ ಕರುಣಿಸುವ ಅಂಶಗಳೊಂದಿಗೆ ಅರುಣ್ ಅಮುಕ್ತ ಈ ಚಿತ್ರವನ್ನು ಕಟ್ಟಿಕೊಟ್ಟಿದ್ದಾರಂತೆ. ಸದ್ಯಕ್ಕೀಗ ಬಿಡುಗಡೆಗೊಂಡಿರುವ ಪೋಸ್ಟರ್ ಮತ್ತು ಮೋಷನ್ ಪೋಸ್ಟರ್‍ಗಳ ಸುತ್ತ ಒಂದಷ್ಟು ನಿರೀಕ್ಷೆ, ಚರ್ಚೆಗಳು ಹರಳುಗಟ್ಟಿಕೊಂಡಿವೆ!
ರ್ಯಾಪರ್ ಆಗಿ ಒಂದಷ್ಟು ಹೆಸರು ಮಾಡಿದ್ದ ಚಂದನ್ ಶೆಟ್ಟಿ ನಾಯಕನಾಗಿಯೂ ರೂಪಾಂತರಗೊಂಡಿದ್ದು ಗೊತ್ತೇ ಇದೆ. ಆ ಹಾದಿಯಲ್ಲೀಗ ಮತ್ತೊಂದು ಬಗೆಯ ಪಾತ್ರದಲ್ಲಿ ಚಂದನ್ ಕಾಣಿಸಿಕೊಂಡಿರುವ ಚಿತ್ರ ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ. ಈ ಚಿತ್ರದಲ್ಲಿ ಚಂದನ್ ನಾಯಕನಾಗಿ ನಟಿಸಿದ್ದರೂ ಕೂಡಾ ಈವರತೆಗೂ ಚಿತ್ರತಂಡ ಆ ಪಾತ್ರದ ಚಹರೆಗಳನ್ನು ಕಾಣಸಿಲ್ಲ. ಆ ಬಗೆಗಿನ ಕುತೂಹಲವಿರುವವರಿಗೆಲ್ಲ ಶಿವರಾತ್ರಿಯ ಸಂದರ್ಭದಲ್ಲಿ ಸರ್ ಪ್ರೈಸ್ ಕಾದಿದೆ. ಆ ದಿನ ಚಂದನ್ ಶೆಟ್ಟಿಯ ಗೆಟಪ್ಪು ಪೋಸ್ಟರ್ ಒಂದರ ಮೂಲಕ ಜಾಹೀರಾಗಲಿದೆ.
ಇದೀಗ ಚಿತ್ರೀಕರಣದ ಅಂತಿಮ ಘಟ್ಟದಲಿರುವ ಈ ಚಿತ್ರವನ್ನು ಸುಬ್ರಮಣ್ಯ ಕುಕ್ಕೆ ಮತ್ತು ಶಿವಲಿಂಗೇಗೌಡ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಕುಮಾರ್ ಗೌಡ ಛಾಯಾಗ್ರಹಣ, ಭರ್ಜರಿ ಚೇತನ್ ಮತ್ತು ವಾಸುಕಿ ವೈಭಣವ್ ಸಾಹಿತ್ಯ, ಪವನ್ ಗೌಡ ಸಂಕಲನ, ಟೈಗರ್ ಶಿವು, ನರಸಿಂಹ ಸಾಹಸ ನಿರ್ದೇಶನ ಈ ಚಿತ್ರಕ್ಕಿರಲಿದೆ. ಅಮರ್, ಭಾವನಾ, ಮಾನಸಿ, ವಿವಾನ್, ಭವ್ಯ, ಸುನೀಲ್ ಪುರಾಣಿಕ್, ಅರವಿಂದ ರಾವ್, ಸಿಂಚನಾ, ರಘು ರಾಮನಕೊಪ್ಪ, ಪ್ರಶಾಂತ್ ಸಂಬರ್ಗಿ, ಕಾಕ್ರೋಚ್ ಸುಧಿ ಮುಂತಾದವರು ನಟಿಸಿದ್ದಾರೆ. ಇನ್ನುಳಿದಂತೆ ವಿಜೇತ್ ಕೃಷ್ಣ, ವಾಸು ದೀಕ್ಷಿತ್ ಮತ್ತು ಶಶಾಂಕ್ ಶೇಷಗಿರಿ ಸಂಗೀತ ನಿರ್ದೇಶನ ಮಾಡಲಿದ್ದಾರೆ.