ಕರ್ನಾಟಕ ಸರ್ಕಾರ ಕಡೆಗೂ ಹಂಪಿ ಉತ್ಸವಕ್ಕೆ (hampi uthsava) ಮುಹೂರ್ತ ನಿಗಧಿ ಮಾಡಿದೆ. ಇದೇ ಫೆಬ್ರವರಿ 4ರಿಂದ ಮೂರು ದಿನಗಳ ಕಾಲ ಎಂದಿನಂತೆ ಅದ್ದೂರಿಯಾಗಿ ಈ ಉತ್ಸವ ಜರುಗಲಿದೆ. ಸದ್ಯದ ಮಟ್ಟಿಗೆ ವಿಜಯನಗರ ಸಾಮ್ರಾಜ್ಯದ ಕೆಲ ಕುರುಹುಗಳನ್ನಷ್ಟೇ ಹಂಪಿ ತನ್ನೊಡಲಲ್ಲಿ ಬಚ್ಚಿಟ್ಟುಕೊಂಡಿದೆ. ಅದರ ಅಸಲೀ ಛಾಯೆಯನ್ನು ನೆನಪಿಸಿಕೊಳ್ಳುತ್ತಾ, ಆ ವೈಭವೋಪೇತ ಘಳಿಗೆಗಳನ್ನು ಮನನ ಮಾಡಿಕೊಳ್ಳುವ ಈ ಉತ್ಸವಕ್ಕೊಂದು ಘನತೆ ಇದೆ. ಈ ಕಾರಣದಿಂದಲೇ ಸದರಿ ಉತ್ಸವದಲ್ಲಿ ಭಾಗಿಯಾಗೋದನ್ನು ಸೆಲೆಬ್ರಿಟಿಗಳೂ ಕೂಡಾ ಪ್ರತಿಷ್ಠೆಯೆಂಬಂತೆ ಸಂಭ್ರಮಿಸುತ್ತಾರೆ. ಈ ಬಾರಿ ಅಂಥಾದ್ದೊಂದು ಸುವರ್ಣಾವಕಾಶ ನಟಿ (actress nimika ratnakar) ನಿಮಿಕಾ ರತ್ನಾಕರ್ ಪಾಲಿಗೆ ಒಲಿದು ಬಂದಿದೆ!
ಚಾಲೆಂಜಿಂಗ್ ಸ್ಟಾರ್ ದರ್ಶನ್ (challenging star darshan) ಜೊತೆ ಶೇಕ್ ಇಟ್ ಪುಷ್ಪವತಿ ಹಾಡಿಗೆ ಹೆಜ್ಜೆ ಹಾಕುವ ಮೂಲಕವೇ ಮುನ್ನೆಲೆಗೆ ಬಂದವರು; ಪ್ರಸಿದ್ಧಿ ಪಡೆದುಕೊಂಡಿರುವವರು (nimika ratnakar) ನಿಮಿಕಾ ರತ್ನಾಕರ್. ಆ ಹಾಡಿನ ಪ್ರಭೆಯಲ್ಲಿಯೇ ಅವರಿಗೆ ಹಂಪಿ ಉತ್ಸವದಲ್ಲಿ ಪಾಲ್ಗೊಳ್ಳುವ ಅವಕಾಶ ಕೂಡಿ ಬಂದಿದೆ. ಆ ವೇದಿಕೆಯಲ್ಲಿ ಹೈ ವೋಲ್ಟೇಜ್ ನೃತ್ಯ ಪ್ರದರ್ಶನ ನೀಡಲು ನಿಮಿಕಾ ಇದೀಗ ಭರದಿಂದ ತಾಲೀಮು ನಡೆಸುತ್ತಿದ್ದಾರೆ. ಸಾಮಾನ್ಯವಾಗಿ ಹಂಪಿ ಅಂದರೇನೇ ಕರುನಾಡಿನ ಎಲ್ಲ ದಿಕ್ಕುಗಳಲ್ಲಿಯೂ ಹೇಳಲಾರದ್ದೊಂದು ಮೋಹ ಹಬ್ಬಿಕೊಂಡಿದೆ. ಅಂಥಾದ್ದೊಂದು ಹಂಪಿಯೆಡೆಗಿನ ಪ್ರೀತಿ ಹೊಂದಿರುವವರು ನಿಮಿಕಾ. ಆದರೆ, ಈ ವರೆಗೂ ಅಲ್ಲಿಗೆ ಭೇಟಿ ನೀಡಲು ಸಾಧ್ಯವಾಗಿರಲಿಲ್ಲವಂತೆ.
ಆ ಕೊರಗೀಗ ನೀಗಿದೆ. ಕೇಳಿಸದೆ ಕಲ್ಲುಕಲ್ಲಿನಲಿ ಕನ್ನಡ ನುಡಿ ಎಂಬಂಥಾ ಹಾಡುಗಳಲ್ಲಿ ಮಾತ್ರವೇ ನೋಡಿದ್ದ ಹಂಪಿಯನ್ನು ಕಣ್ತುಂಬಿಕೊಳ್ಳುವ ಕ್ಷಣಕ್ಕಾಗಿ ನಿಮಿಕಾ ಕಾತರರಾಗಿದ್ದಾರೆ. ಇಂಥಾದ್ದೊಂದು ಸುವರ್ಣಾವಕಾಶ ತನ್ನ ಪಾಲಿಗೆ ಕೂಡಿ ಬಂದಿದ್ದಕ್ಕೆ ಪುಷ್ಪವತಿ ಹಾಡಿನ ಕ್ರೇಜೇ ಕಾರಣ ಎಂಬುದು ನಿಮಿಕಾರ ಧನ್ಯತೆ. ಅಷ್ಟಕ್ಕೂ ಅದೊಂದು ಹಾಡು ನಿಮಿಕಾ ಪಾಲಿಗೆ ಕಟ್ಟಿಕೊಟ್ಟ ಸಂಭ್ರಮ ಸಣ್ಣದೇನಲ್ಲ. ಅದು ಇಡೀ ಕರ್ನಾಟಕವನ್ನು ಟೂರು ಹೊಡೆಯುವ ಅವಕಾಶ ಕಲ್ಪಿಸಿದೆ. ರಾಜ್ಯದ ನಾನಾ ಭಾಗಗಳಲ್ಲಿ ನೃತ್ಯ ಪ್ರದರ್ಶನ ನೀಡುವ ಅವಕಾಶ ಕಲ್ಪಿಸಿದೆ. ಇದೀಗ ಹಂಪಿ ಉತ್ಸವದ ಸರದಿ…
ಹಂಪಿ ಉತ್ಸವದ ಮೂಲಕ ಉತ್ತರ ಕರ್ನಾಟಕದ ಸಿನಿಮಾ ಪ್ರೇಮಿಗಳನ್ನು ಮುಖಾಮುಖಿಯಾಗುತ್ತಿರೋ ಖುಷಿ ನಿಮಿಕಾರಲ್ಲಿದೆ. ಉತ್ತರ ಕರ್ನಾಟಕ ಸೀಮೆಯಲ್ಲಿ ಅದೆಂಥಾ ಸಿನಿಮಾ ಪ್ರೇಮವಿದೆ, ಅಲ್ಲಿನ ಮಂದಿಯ ಅಭಿಮಾನದ ತೀವ್ರತೆ ಎಷ್ಟಿದೆ ಎಂಬುದು ಎಲ್ಲರಿಗೂ ಗೊತ್ತಿರುವಂಥಾದ್ದೆ. ಅಂಥಾ ಗಾಢ ಪ್ರೀತಿ, ಅಭಿಮಾನ ಪುಷ್ಪವತಿ ಹಾಡಿನ ಮೂಲಕ ನಿಮಿಕಾಗೂ ದಕ್ಕಿದೆ. ಅಂದಹಾಗೆ, ಈ ಹಿಂದೆ ಅವರು ದಸರಾ ವೇದಿಕೆಯಲ್ಲಿ ನೃತ್ಯ ಪ್ರದರ್ಶನ ಮಾಡಿದಾಗ ಪೋಷಕರು ಹಾಜರಿದ್ದು ಸಂಭ್ರಮಿಸಿದ್ದರಂತೆ. ಹಂಪಿ ಉತ್ಸವವನ್ನೂ ಕೂಡಾ ಹೆತ್ತವರೊಂದಿಗೆ ಸಂಭ್ರಮಿಸುವ ಇರಾದೆ ನಿಮಿಕಾರಲ್ಲಿದೆ!